बीड : ‘दरवाजा बंद, तर आजारपण बंद’ या पत्रकाचे प्रकाशन नुकतेच बीड जिल्हाधिकारी कार्यालयात करण्यात आले. ‘दरवाजा बंद’ म्हणजे शौचालयाचा नियमित वापर करणे. यासाठी बीड जिल्ह्यात जिल्हा परिषदेमार्फत नवीन शौचालयांचे बांधकाम व शौचालयाचा नियमित वापर करण्याबद्दलच्या जनजागृतीवर भर दिला जात आहे. जिल्ह्याच्या हागणदारीमुक्तीसाठी अतिशय वेगाने काम सुरू आहे.
बीड जिल्हाधिकारी कार्यालयात खासदार, तसेच विधानसभा व विधान परिषद आमदार यांच्यासह जिल्हा परिषदेचे पदाधिकारी आणि सदस्य यांची संयुक्त बैठक नुकतीच झाली. त्यात योजनांच्या अंमलबजावणीचा आढावा घेण्यात आला. येत्या दोन ऑक्टोबरपर्यंत बीड जिल्हा हागणदारीमुक्त करण्याच्या सूचना जिल्हा परिषदेला करण्यात आल्या आहेत. त्याचाच भाग म्हणून पहिल्या टप्प्यात सर्व जिल्हा परिषद सदस्यांनी आपले गाव व ग्रामपंचायत परिसरात उघड्यावरील शौचाची पद्धत बंद करावी असे निर्देश बैठकीत देण्यात आले.
या वेळी खासदार डॉ. प्रीतम मुंडे, जिल्हा परिषद अध्यक्षा सविता गोल्हेर, आमदार जयदत्त क्षीरसागर, भीमराव धोंडे, विनायक मेटे, आर. टी. देशमुख, संगीताताई ठोबंरे, लक्ष्मण पवार, जिल्हा परिषद उपाध्यक्षा जयश्री म्हस्के, जिल्हा परिषद मुख्य कार्यकारी अधिकारी नामदेव ननावरे यांची प्रमुख उपस्थिती होती. याचबरोबर जिल्हा परिषद सदस्य आणि पदाधिकारी उपस्थित होते.